کپنک قانادیندا
درباره سایت
آخرین مطالب
امکانات وب
اوشاق لارین اؤزل دونیالاری وار.اوشاق لار اوچون یازان شاعیر ایله یازیچی بو دونیایا گیریب یاشامالیدیر بو دونیادا.بو باجاریغی الده ائتمک چتین بیر ایش اولاراق اوشاق لارا یازماقدا چتین دیر.چوخ چتین دیر.اوشاغین تعاروفو یوخدو اوشاق ایکی اوزلو دئییل؛هئچ چکینمه دن سئومه دیی یئمه یی الی ایله دالی ووردوغو کیمی سئومه دیی شعری،ناغیلی و حیکایه نی ده ائشیدرکن داریخاجاق دوداق لارینی بوزه جک،الی ایله دالی ووراجاق.اوشاغین تجروبه سی بو دونیادان آز اولسادا گئنیش همده چوخ اؤزل خیالی وار.نئچه آی بوندان قاباق(یازین سون آییندا)مرند ده ایلدیریم چاخاراق شیمشک ووراراق یاغیش یاغیردی.ایکی یاش یاریم"سونای"آد دا قیزیمیزی آناسی یاغیشی گؤرستمک اوچون حیطه آپاریر.سونای ایلدیریمی گؤررکن اونو اؤز چکدییی نقاشی سینا(جیزدیغی جیزیق لارینا)اوخشاداراق :
-ایلدیریم چالدی!من دایناسور چکدیم.-دئیه آناسینی شاشیردیر.آراشدیرمالارا گؤره اوشاق لار ایکی یاش لاریندا نقاشی چکمه یه باشلادیقدا ایلک اولاراق نقطه قویارلار سونرا بالا-بالا کیچیک جیزیق لار چکرلر.یاشا دولدوقجا بو جیزیق لار اوزانار و نقطه لر ایری بویروق دایره اولار.بیزیم سونای دا ایری بوروق جیزیق لار چکرک دئییردی بو دایناسوردو.او گون آناسی ایلدیریمی گؤرسه دیب دئیه رک:
-سونای باخ ایلدیریم چالدی!
سونای ایلدیریمین گؤیده ایری بویرو جیزیغینی کاغاذدا اؤزو چکدیی دایناسورا اوخشاداراق آناسینی شاشیردیر.
منجه بو بیر شعردیر.ائشیتدیگیم ان گوجلو ان صمیمی همده دوغال بیر شعر.اوشاغین کیشی سل تجروبه سیندن قیدالاناراق دویغوسوندان آخان بیر شعر دیر.اوشاقدان سونرا هئچ کیم بو اوخشارلیغی بو کؤرپونو قورا بیلمز.ایلدیریمی دایناسورا اوخشادا بیلمز.بئله نچی بیر خیالا ال تاپماق بؤیوک لره چوخ زور ایشدی بلکه ده هئچ اولاسی دئییل.
بیر دؤنه اوغلوم 5یاشیندا اولارکن(ایندی 15 یاشی وار)تیلفونو گؤتوروب دویمه لرینی باسیردی.
-آراز کیمه تیلفون ائله ییرسن؟-دئیه سوروشدوم.
-آللاها تیلفون ائلیرم.منی قافلان ائله سین-دئیه،منه باخمایاراق دویمه لری دالبادال باسیردی.
آراز او یاش لاریندا اؤزونه ایپدن قوماشدان بیر قویروق تاخاراق دوز قافلان لار کیمی پلنگ لر کیمی هوبباشاردی قاچاردی.قافلان اولماق اوچون آللاها تیلفون ائتمک اوشاقدان باشقا کیمین فیکرینه چاتار؟!یالنیز بیر اوشاق ایستر قافلان اولسون و ساختا بیر قافلان اولماغا راضی اولمایاراق گئرچک قافلان اولماق اوچون آللاه زنگ آچسین.بئله نچی دویغولار و اولای لار یالنیز اوشاق لارین دونیاسیندا یارانا بیلر.یارانیب یاشایا بیلر.
من هر دؤنه اوشاق لار اوچون بیر شعر یا حیکایه یازدیقدا بئله نچی بیر خیالا ال تاپاراق بئله نچی بیر دونیا-یا گیرمک ایسته ییرم؛آنجاق اؤزومو هئچ باشاریلی گؤرمورم.بونا من صراحتله آچیق جاسینا اعتراف ائدیرم.بونا باخمایاراق ایچیمدن بیر سس منی هئی قورشالاییر بو ایشه.بیرده اوشاق لارا یازارکن او تیتیز او اینجه حایاتی بیر داها یاشاییرام.اوشاق لارین دونیاسی آللی-بویالی،گوللو-چیچکلی بیر دونیادیر.اورایا گیرمک اوچون اوستونو فیکرینی آریندیریب للک کیمی یونگول اولاراق بیر موشتولوق دان بیر قوولوقدان یاپیشیب اوچمالییام.کپنک لرده منه یاردیمجی اولا بیلرلر.اونلارلا دانیشماغی باجارسام اگر. (20/9/94)
آللاها تیلفون!
(محمد عابدین پور)
بیر آز یوخولویام
کارتونا باخمیشام بیر آز
بیر آزدا حئیوان لار مستندینه
بیر آز قئیم اوینامیشام
هئی آزالیب جانیم
آز قالمیشام اؤلم
دیبده اوتموشام
بیر آز یوخولویام
بیر آزدا یورغون
اسنه یه نده
لاپ سو آیغری اولورام
آغزیم آچیلیر دیبه جن
آغزیمدا دؤرد دیشیم وار
ایکیسی اوست ده
ایکیسی آلت دا
دوز سو آیغیری لار کیمی اینان
بئله کی قالمایاجام
دیبده چیخاجاق ات دیش لریم
آنام دئمیشکن
اوندا بیر کورکودیل اولاجام
یادا بیر قافلان اولدوم
به به ده آسلان
بو سود دیش لری نه دی آخی
هردن بیری لاخلاییر
سورادا دوشور
دیشلمک اولمور برکدن بیر زادی
کاش دیمدییم اولاردی
کاش قارتال اولاردیم
گوجلو قانادلاریم اولاردی
دوروم
دوروم تیلفون ائله ییم آللاها.
19/12/92
برچسب:
نویسنده: ایلیا خوشنام